Les mots surlignés font l'objet d'une note
1Reçue à Montélimar, le 17 septembre 1573.
2Mon cousin, jay faict mon eedict de paciffication en intention de mectre mes subgectz
3en repos et les dellivrer des vexations de la guerre. Toutesfois, je suis adverty
4que mon pauvre peuple ne laisse destre affligé et oprimé aultant que jamais
5par plusieurs compaignies de gendarmes et autres soldatz et gens de guerre
6à pied qui tiennent les champs, vont rodant le pays, et font des maux
7et extorsions innumerables, soubz couleur de se retirer en leurs maisons,
8dont je suis très desplaisant ; et daultant plus, par ce quil semble que
9la licence a prins telle habitude et auctorité, ou que la negligence soict telle
10que personne singère dy remedier, comme si tout estoict habandonné et
11à la descretion des meschans ; chose qui me poise à bon droict tellement sur
12le cœur et m’est si importante que je ne seray jamais contant que il ny soict
13pourveu comme il appartient. Au moyen de quoy, mon cousin, je vous prie
14daultant que vous desirez me faire service à Grenoble, dambrasser lexecution
15de ma volunté et en cest endroict aultant que la raison mes commandemens et
16le debvoir vous y obligent, et faire faire commandement très expres à cry
17public par tous les lieux et endroictz de votre gouvernement à ce faire accoustumez
18à toutes lesdites compaignies de mes ordonnances, gens de pied et autres gens de
19guerre de se retirer incontinant en leurs maisons et demeures sur peine
20de la vie ; et où après ladite publication il sy en retrouverra encores quelques
21ungs par les champs, sans adveu, les faire prandre et punir très rigoureusement ;
22et pour le regard des compaignies qui passent d’ung lieu à autre par mon
23commandemant et pour mon service, comme pour changer de garnison se retirer
24en leurs maisons ou pour autres causes, dont ilz feront apparoir silz vivent
25autrement quilz ne doibvent, rançonnent et pillent mon pauvre peuple
26comme la pluspart sont acoustumez de faire à mon très grand regret, je
27vous prie, mon cousin, en faire faire examplaire chastimant, de manière
28que cela puisse tenir en pollice les autres, au soulagement de mondit pauvre
29peuple ; et affin que nulle compaignie puisse entrer en votre gouvernement
30sans que vous en soyez adverty, comme il advient assez souvant que les
31premières nouvelles que lon a delles viennent des extorsions et pilleries
32quelles font, quil soict, par ladite publication, deffendu à toutes compaignies
33tant de cheval que de pied, de mectre le pid et singerer d’entrer en
34votredit gouvernement sans premierement vous en avoir adverty, affin que le
35chemin quilz auront à tenir passant en icelluy, leur soict par vous
36prescript, ou le lieu de leur garnison silz sont ordonnez pour cest effect, commectant
37quelqu'un au près de chacune, tant pour les conduire prandre garde à leur
38manière de vivre que pour leur faire administrer ce qui leur sera de besoing,
39davantage que il soict ordonné aux prevostz des mareschaux des lieux
40[164 v°] de mectre à leur queue pour faire justice de ceulx qui le meriteront
41et faire droict à qui il apartiendra si ce sont compaignies qui ne doibvent
42que passer quand elles approcheront ung autre gouvernement celluy
43que vous aurez mis à la conduicte d’icelles, ne fauldra d’en advertir
44le gouverneur et lieutenant general dicelluy, affin quil les envoye recevoir.
45Pareillement, me manderez les noms des compaignies et de celluy qui
46y commandoict, et comme elles auront vescu. Cest ordre estant
47bien suivy, jestime, mon cousin, quil sera bien facille de reprimer les
48insolences qui règnent, parquoy je vous prie sur tout que desirez me
49contanter de le faire garder comme il appartient de mode, que me reposant
50sur vous de ce faict, puis que vous en ay mandé mon intention, je sois
51asseuré que mondict pauvre peuple ne sera plus vexé, ny opprimé en
52votre dit gouvernement, comme il a esté jusques icy et que je nen aye plus de
53plainctes. Priant Dieu, mon cousin, vous avoir en sa saincte garde.
54Escript à Paris, le dernier jour daoust 1573.
55Charles
56de neufville s[ecretair]e